A organización do Festival de Jazz de Eivissa encargoume por segundo ano a selección dun grupo de jazzistas do estado español para unha actuación exclusiva no Eivissa Jazz 2007 o 7 de Setembro. O grupo estará formado por : Perico Sambeat (saxo alto), Víctor de Diego (saxo tenor), Abe Rábade (Piano), Alexis Cuadrado (Contrabaixo) e Marc Miralta (batería).
Acabo de chegar de Gran Canaria. O único negativo foron as viaxes. Nada menos que 7 horas e media de espera para coller o avión de volta a Compostela. En fin, males menores porque o realmente importante foi a minixira Canaria coa extraorinaria cantante Claudia Acuña acompañada polo cuarteto de Raynald Colom.
Foron dous concertos en Tenerife e Las Palmas nos que tocamos temas do último álbum de Claudia chamado Luna e novas composicións que estarán no seu seguinte traballo. Foi unha experiencia realmente gratificante.
Filed by Abe at 8:47 pm under Concertos
125 Comments
O vindeiro Domingo 3 de Xuño terá lugar o Concerto de Fin de Curso do VI Seminario Permanente de Jazz de Pontevedra no Teatro Principal da cidade. Un total de 8 combos interpretará un variado programa que pon fin a este ano académico 2006-2007 no que o SPJ gozou do seu record de alumnado (42 inscritos no curso regular). O verán ven cargado de actividades, como os 2 Workshops: en Xullo o Pontejazz e en Agosto o Canjazz. máis info en
Filed by Abe at 2:47 pm under Concertos, Novas
3589 Comments
O Mércores 16 de Maio ás 21h no Auditorio de Galicia de Santiago de Compostela terá lugar a actuación de TEN JAZZ MEN
Xavier “GDJazz” Pereiro trompeta & fliscorno
David Santiago trompeta & fliscorno
Rui Teixeira saxo alto
Martín Brea saxo tenor
Toño Otero saxo barítono
Toño Rodríguez trombón & bombardino
Felipe Villar guitarra
Iago Vázquez piano
Juansi Santomé contrabaixo
Iago Fernández batería
Dirección Musical Abe Rábade
Ten Jazz Men pecharán o Ciclo Composjazz ’07 presentando o seu traballo discográfico May’s Idea.
Filed by Abe at 9:31 pm under Concertos
137 Comments
O día 23 deste mes teño prevista unha actuación a Piano Solo neste impoñente palacete co gallo da inauguración da exposición Galicia en Cartel. O fermoso pazo está na rexión alemana de Schleswig Holstein, ó norte do país, preto de Hamburgo. Esta exposición, coordenada por Ruth Varela e Pablo Ferreiro estivo no Pazo de Fonseca de Compostela de Setembro a Outubro de 2005, onde xa tivera a oportunidade de colaborar cedendo unha hora e media de música miña xa editada para unha das salas. Despois estivo en Montevideo e en Buenos Aires. Nesta ocasión imos polo directo nun formato tan especial como o piano solo. A sala é moi bonita e o piano un Steinway!!
Filed by Abe at 9:42 pm under Concertos
2144 Comments
Vaia mes de Marzo… Intenso pero desde logo proveitoso. O concerto de Jaca foi especial!! Nelson Cascais e Bruno Pedroso danme a vida neste meu proxecto máis preciado e especial: o trío.
DIARIO DE ABORDO:
Telequinesia (do grego τηλε tele, ‘distante’ e κίνησις kinesis, ‘movemento’) é efectivamente a capacidade para mover obxetos ou modificalos utilizando a enerxía da mente sen entrar en contacto físico en momento algún.
Por outra banda, todo o que teña masa e ocupa un volume ten densidade (tamén os gases). Mídese en gr/cm3 ou kg/m3
Loángele (S.L.) é unha tenda de discos especializada en álbums de Sting (senón que llo pregunten a Bea ou a Bruno).
Elías e Bea, quérovos moito, xa o sabedes!!
Filed by Abe at 5:16 pm under Concertos
484 Comments
O Sábado 31 estaremos en Jaca (Huesca) presentando o Playing on Light. De novo coa proxección das sete fotos que cimentan este proxecto durante o concerto. De novo disfrutando de dous talentos: Nelson Cascais no contrabaixo e Bruno Pedroso na batería.
Filed by Abe at 10:59 pm under Concertos
100 Comments
Onte foi o fin do ciclo Jazz no Principal en Pontevedra. O concerto de Míkel Andueza con Ten Jazz Men foi sólido e atraeu a bastante xente ó teatro. Cómo toca este saxofonista!! Solos espectaculares en In Vogue, Broken Chart, All the things you are e Fuiji… No Night & Day houbo jam session tardía (máis se cabe co cambio de hora). Tocamos Juansi, Felipe, os Iagos, Max, Míkel, Toño, Rafa, Antón, Carlos e menda. Divertido… especialmente You don’t know what love is e Cherokee. Fin de festa con When the Saints go marchin’ in (altas horas…..). Momento surrealista: insistente home con gafas con afán de técnico de son irritante, bailarín contemporáneo e grande amante dun disco de McCoy Tyner que nos quedou clarísimo que se chama TRIDENT… En fin… Viva o Jazz Acústico!!
Filed by Abe at 12:36 pm under Concertos
135 Comments
Onte houbo jam no Dado. Levamos sete anos, que se dí pronto…
O grupo formado por Marcos Vázquez (batería), Barry Edwards (guitarra) e Mariano Martos (baixo eléctrico) foi o encargado de abrir a jam. Esta banda, Animales Domésticos, acaba de editar disco en Free Code Jazz Records. Tiven a oportunidade de gravar uns teclados nun dos temas deste traballo discográfico. Gústame o sonido equilibrado do trío.
Na jam faltaba un baixista que lle quitase traballo a Mariano, quen tivo que tocar todo o tempo ata que nun arrouto pola miña parte desfixen un par de temas tocando eu o baixo eléctrico. En fin.. Gustaríame telo feito bastante mellor, pero foi divertido.
O fin de festa foi realmente especial: sesión afrocubana con Elvis e Iago nas congas e eu tentando levar cáscaras nun hi-hat. Intenso e gozoso!!
O Martes que ven hai máis Animales Domésticos. Non o perdades.
Filed by Abe at 1:03 am under Concertos
5857 Comments
O vindeiro 24 de Marzo no Teatro Principal de Pontevedra ás 21:30 actuarán os Ten Jazz Men con Míkel Andueza de convidado especial no saxo alto. Este concerto pecha o ciclo Jazz no Principal 2007 organizado polo Seminario Permanente de Jazz de Pontevedra. Ten Jazz Men é unha bigband reducida que se formou en 2006 co gallo do Festival de Jazz de Cangas Canjazz. O grupo participou tamén no Festival de Jazz de Lugo en Novembro do ano pasado e na Gala do XXV Aniversario do Parlamento de Galicia celebrada no Auditorio CaixaNova de Pontevedra. O 16 de Maio Ten Jazz Men tocará no Auditorio de Galicia de Santiago de Compostela pechando o ciclo Composjazz. O primeiro disco da banda chámase May’s Idea e foi editado por Free Code Jazz Records en 2007.
Míkel Andueza é un dos máis destacados saxofonistas da escena jazzística peninsular. Na mañá do día 24 ofrecerá unha Master Class na sé do SPJ en Pontevedra (Alfonso XIII, nº 7). O repertorio para esa noite é unha selección especial de temas nos que o saxo alto ten un destacado papel como solista.
Inclúovos as liner notes que preparei para o primeiro disco de Ten Jazz Men:
O proxecto Ten Jazz Men nace en Agosto de 2006 como unha producción propia do Canjazz (Workshop + Festival de Jazz de Cangas). A idea central da proposta era a de formar unha bigband reducida na que os seus integrantes aportaran boa parte do seu repertorio con material orixinal. Pedinlles composicións a Xavier Pereiro (Black May), Telmo Fernández (Tip, Tap, Toe) e a Iago Vázquez, que mesmo arranxou o seu tema para o grupo (Capicúa). Desta maneira, a proposta constituía un vehículo de expresión tanto interpretativa como compositiva para os seus membros, vencellados todos eles ao SPJ. Arranxei os temas de Xavier e Iago e engadín dúas composicións miñas (Laranxa Colorada e May’s Idea). Por último pensei que sería interesante incluír no programa unha versión dunha preciosa peza tradicional galega (Non Sei) e tamén un standard do repertorio clásico do jazz (All the things you are). Para aquel primeiro concerto no Canjazz tivemos a sorte de poder incluír unha composición de Jesús Santandreu expresamente escrita para a banda (Isabel y Fernanda). A presente gravación foi feita en Pontevedra unha semana despois da exitosa estrea do grupo ante o público en Cangas.
Ten Jazz Men é unha formación con continuidade tal e como se constatou coa sús participación no Festival de Jazz de Lugo e na gravación en directo para a TVG do Especial XXV Aniversario do Parlamento de Galicia no Auditorio CaixaNova en Pontevedra. Neste 2007 o grupo participará no Jazz no Principal de Pontevedra co saxofonista basco Míkel Andueza de convidado así como no Festival de Jazz de Santiago de Compostela.
Para min é un verdadeiro pracer asumir a dirección artística dun grupo de talentosos músicos que darán moito que falar. Espero que vos guste o disco!
Filed by Abe at 7:59 pm under Concertos
259 Comments