AB

Acaba de saír o disco Jazz in Galiza Series vol.1 en Free Code Jazz Records. Esta gravación realizada o ano pasado no Pazo da Cultura de Pontevedra é a primeira entrega dunha serie de traballos que serán editados anualmente. A banda conformámola os newyorkers John O’Gallagher (saxo alto) e Jeff Williams (batería) xunto ós galegos Paco Charlín (contrabaixo) e Abe Rábade (piano). A filosofía desta colección é amosar o interesante intercambio musical entre músicos convidados a Galiza e jazzistas de aquí. Xa hai anos que o Seminario Permanente de Jazz de Pontevedra leva a cabo accións semellantes, que agora fructificarán en discos coma o presente.
O repertorio do disco confórmano orixinais de John O’Gallagher (Faith of Fable e Go Where You’re Watching), Paco Charlín (J Trane Blues, High Direction e The God’s Rain), Abe Rábade (Circle with an Ending e Casa Paco) e unha sesión de improvisación colectiva baixo o título Conversation with the Souls.
Para mercar o disco, visitade o site www.freecodejazzrecords.com

Filed by Abe at 7:55 pm under Novas
220 Comments

É moita a distancia que nos separa á xente con certas responsabilidades á hora de promover o jazz neste país. Acabo de recibir o programa (cuatriplicado, por certo, menos mal que na casa se recicla…) do ciclo de jazz de Barrié de La Maza na Coruña e Vigo para este 2007. Eu podo entender a querencia polas primeiras figuras da escena jazzística internacional por parte da organización. É máis, atopo realmente interesante a aposta por xente tan sólida como Payton, Bridgewater ou Lonnie Smith. Pero o que me indigna poderosamente é a non presencia de absolutamente ningún nome en cartel de músicos de Galiza. Estamos en Galiza, señores!! A única referencia ós músicos galegos aparece o día 26 de Abril co seguinte texto (sic.): incluirá una jam session con músicos gallegos. Vaia, os restos do cocido sen sequera nomear os garbanzos que quedan para a noite. É un insulto en toda regra.

O momento actual do jazz neste país permite outro tipo de programación. Hoxe asistimos a unha morea de lanzamentos discográficos anualmente. Non hai excusa. Por se fose pouco hai unha canteira impresionante de talentos que se están a formar en Galiza. Ten moito delito que habendo jazzistas como Paco Charlín, Ramón Ángel, Manolo Gutiérrez, Santi Quintáns, Max Gómez, Xacobe Martínez, Roberto Somoza, Baldo Martínez, Virxilio da Silva, Pablo Castaño, Carlos López e un longuísimo etcétera, non se inclúa ningunha das súas propostas nunha programación deste tipo. Como dicía o outro, quen teña oídos para oír que oia!!

Filed by Abe at 7:00 pm under Novas
1879 Comments

O día 23 deste mes teño prevista unha actuación a Piano Solo neste impoñente palacete co gallo da inauguración da exposición Galicia en Cartel. O fermoso pazo está na rexión alemana de Schleswig Holstein, ó norte do país, preto de Hamburgo. Esta exposición, coordenada por Ruth Varela e Pablo Ferreiro estivo no Pazo de Fonseca de Compostela de Setembro a Outubro de 2005, onde xa tivera a oportunidade de colaborar cedendo unha hora e media de música miña xa editada para unha das salas. Despois estivo en Montevideo e en Buenos Aires. Nesta ocasión imos polo directo nun formato tan especial como o piano solo. A sala é moi bonita e o piano un Steinway!!

Filed by Abe at 9:42 pm under Concertos
2244 Comments

Veño de pasar dous días por Bergantiños co amigo Serxio Moreira. Visitamos o Refuxio de Verdes con todos aqueles muíños integrados no sonoro río Anllóns. Esa noite houbo percorrido ata altas horas por Laxe, Malpica e Ponteceso. Boa onda!! Ó día seguinte, despois dun bacallau impoñente, houbo tempo de dixerilo coa nosa subida cal cabras tolas ós Penedos de Pasarela (facía tempo que non practicaba eu a escalada agreste e a verdade é que teño maniotas aínda…). Máis tarde fomos ó Cabo Vilán. Fermoso desde logo, pero bastante impresentables todos os rótulos de alí que incluían varios Cabo Villano (villanos do idioma son eles). De volta pasamos por Camariñas en plena exaltación dos seus encaixes. Moi recomendable a taberna kitsch O Curveiro. E xa chegando a Cabana de Bergantiños parada no Dolmen de Dombate…

E nos Castros de Borneiro…

Impresionante comprobar os lugares tan especiais elixidos para a morte e a vida hai 3000 anos.

Volvemos á noite a Compostela, como non, Dado Dadá onde estivemos ata altas horas o Serxio, Ferro, Androtxo, Álex e despois de tanto tempo o Géber (que marchaba directo ó aeroporto nunhas horas).
Minivacacións moi enxundiosas. Graciñas Moreira!!

Filed by Abe at 6:22 pm under De re varia
415 Comments

Vaia mes de Marzo… Intenso pero desde logo proveitoso. O concerto de Jaca foi especial!! Nelson Cascais e Bruno Pedroso danme a vida neste meu proxecto máis preciado e especial: o trío.

DIARIO DE ABORDO:

Telequinesia (do grego τηλε tele, ‘distante’ e κίνησις kinesis, ‘movemento’) é efectivamente a capacidade para mover obxetos ou modificalos utilizando a enerxía da mente sen entrar en contacto físico en momento algún.

Por outra banda, todo o que teña masa e ocupa un volume ten densidade (tamén os gases). Mídese en gr/cm3 ou kg/m3

Loángele (S.L.) é unha tenda de discos especializada en álbums de Sting (senón que llo pregunten a Bea ou a Bruno).

Elías e Bea, quérovos moito, xa o sabedes!!

Filed by Abe at 5:16 pm under Concertos
871 Comments